點解我哋成日講教育，講到尾都係離唔開一個字——「驚」？
驚考唔到好成績、驚入唔到大學、驚輸喺起跑線。呢種恐懼喺香港特別強烈，彷彿教育只有一個安全出口，而我哋全部都企喺條隊度等緊。
但最近我喺思考一個問題：如果教育唔係為咗消除恐懼，而係教人點樣帶住恐懼繼續行，會點呢？
呢個諗法，令我想起CLC（Cheltenham Ladies’ College）。佢哋有個校訓叫「Fearless for Failure」。第一次聽嘅時候，我同大部分香港家長一樣，有啲詫異——學校竟然會將「失敗」放喺咁顯眼嘅位置？喺我哋嘅文化入面，失敗通常係避之則吉嘅事，最好就唔好發生。
但仔細諗，呢種「無懼失敗」嘅態度，其實係一種好實在嘅底氣。佢唔係叫你唔好怕，而係話：就算跌低，你都會有方法起身。呢樣嘢，喺一個變化快到你估唔到嘅世界，可能比任何一科A*都更重要。
上星期參觀學校，我同CLC校長Ms. Eve Jardine-Young傾過偈。佢唔係嗰種高高在上、淨係識講理論嘅校長。佢對教育嘅熱情係好具體嘅，尤其係講到AI對未來學習嘅衝擊，佢嘅見解好實際，唔係空談危機，而係諗點樣裝備學生去面對、去適應，甚至去引領變化。呢種態度，正正體現咗Fearless嘅精神：世界變得快，與其驚，不如帶住學生一齊去試。試錯咗？冇問題，我哋一齊分析，一齊再嚟。
更重要嘅係，學校嘅靈魂往往靠人去守。CLC有好多管理層同老師都服務咗好多年，學校嘅傳統同核心價值先可以咁穩固咁傳落去。佢哋嘅教育方法，唔係純粹催谷成績，而係好刻意咁栽培學生嘅自信，同埋面對挑戰時嗰種韌性（Resilience）。呢樣嘢，需要時間，需要空間，更加需要學校上下有一種共同嘅信念。
回到最起點，我哋送子女出國讀書，到底想要啲咩？
係一張靚靚嘅大學取錄信，定係一個跌低之後，識得拍拍灰塵企返起身嘅人？兩者當然唔係互相排斥，但當我哋將全部注意力放喺結果嘅時候，好容易就忽略咗過程入面，對仔女究竟有咩成長咗。
CLC提供嘅，係後者嗰種環境。佢唔係保證你入邊間大學，但佢俾你嘅嗰種歷煉——嗰種容許你嘗試、承認失敗、然後重新出發嘅勇氣——會陪你行好遠。而呢樣嘢，最終可能係一個人喺一生入面，最用得著嘅裝備。
撰文：Samuel Chan（陳思銘）
Samuel Chan（陳思銘）為香港資深升學顧問及專欄作家，自9歲起赴英留學，直至2012年回港創立英識教育Britannia StudyLink，專營英國中小學寄宿學校及大學的配對服務。其後更創立Britannia Gateway 的學術培訓平台，提供更多元化的升學服務。